Montejo tryggði Þór þrjú stig gegn Grindavík

Alvaro Montejo reyndist hetja Þórs gegn Grindavík í 1. umferð Lengjudeildar karla í fótbolta í kvöld. Hann skoraði sigurmarkið í lok leiks, í 2-1 sigri heimamanna. 

Fannar Daði Malmquist Gíslason kom Þór yfir strax á 7. mínútu með marki af stuttu færi, en Aron Jóhannsson jafnaði fyrir gestina sex mínútum síðar.

Það var hins vegar Montejo sem gerði gæfumuninn eins og svo oft áður fyrir Þór en hann skoraði tíu mörk fyrir liðið á síðustu leiktíð og 16 mörk í deildinni árið 2018.

Þórsurum var spáð 6. sæti í Lengjudeildinni í spá fyrirliða, þjálfara og forráðamanna en Grindvíkingum, sem féllu úr efstu deild í fyrra, var spáð 3. sæti.