Missouri höfðar mál gegn Kína

Stjórnvöld í Missouri í Bandaríkjunum hafa ákveðið að höfða mál í Bandaríkjunum gegn Kína þar sem yfirvöld þar í landi eru sögð ekki hafa gert nægilega mikið til að stöðva útbreiðslu kórónuveirunnar.

Dómsmálaráðherra Missouri segir að stjórnvöld í Kína hafi „logið að heiminum“ um hættuna sem hafi stafað af veirunni og hefur nú farið fram á skaðabættur vegna efnahagslegs tjóns og þjáninga.

Í stefnunni segir að kínverskir embættismenn „beri ábyrgð á gríðarlega mörgum dauðsföllum, þjáningu og efnahagslegu tjóni“ um heim allan, þar með talið í Missouri.

Dómsmálaráðherra Eric Schmitt, segir í yfirlýsingu að Kínverjar hafi logið til um þá hættu sem stafaði af veirunni og hve skæður sjúkdómurinn Covid-19 raunverulega er. Þá hafi þeir þaggað niður í þeim sem reynt hafi að greina frá sannleikanum og ekki gert nægilega mikið til að stöðva faraldurinn.

Í frétt Guardian segir að ekki sé ljóst hvort málið muni hafa einhver, ef nokkur, áhrif. Bandarísk lög koma almennt í veg fyrir að hægt sé að höfða mál gegn öðru ríki, með fáeinum undantekningum þó.

Lauren Gepford, talsmaður Demókrata í Missour, segir málið vera lið í kosningabaráttu Schmitt, sem sækist eftir endurkjöri í kosningum síðar á þessu ári.

Alls hafa tæplega sex þúsund kórónuveirusmit verið skráð í Missouri það sem af er, og eru skráð dauðsföll í ríkinu nú 215.