Ætla að senda alla pólska menn í herþjálfun

Pólverjar íhuga einnig að segja sig frá sáttmálum sem meina notkun jarðsprengja og klasasprengja og sagðist Tusk hlynntur því.

Þetta er meðal þess sem Tusk sagði í ræðu í pólska þinginu í dag. hann sagði að ef Rússar nái fullum tökum og innlimi hluta Úkraínu muni staða varnarmála í Póllandi verða mun flóknari.

Vegna þessa væri verið að undirbúa umfangsmikla herþjálfun fyrir alla fullorðna pólska menn, svo Pólverjar eigi varalið sem hægt væri að kalla til herþjónustu með tiltölulega litlum tíma.

Meðal annars vísaði Tusk til breytts viðhorfs yfirvalda í Bandaríkjunum til Rússlands og innrásar Rússa í Úkraínu. Er það eftir að Donald Trump, forseti Bandaríkjanna, hefur stöðvað hernaðaraðstoð handa Úkraínumönnum og skipað hernum að hætta að deila upplýsingum með úkraínskum hermönnum.

Trump hefur einnig ítrekað endurómað áróður sem á rætur í Kreml og neitað að segja að Rússar beri ábyrgð á innrás þeirra í Úkraínu. Þvert á móti hefur hann gefið í skyn að Úkraínumenn beri ábyrgð á innrásinni.

Sjá einnig: Talsmaður Pútíns hrósar Rubio fyrir ummæli um leppastríð

Í gærkvöldi gaf Trump í skyn að hann myndi ekki aðstoða önnur ríki Atlantshafsbandalagsins ef gerð yrði árás á þau og dró í efa að önnur ríki NATO myndu koma Bandaríkjunum til aðstoðar. Það er þrátt fyrir að fimmta grein stofnunarsamnings NATO hafi aðeins einu sinni verið virkjuð, eftir árásina á Tvíburaturnana í New York árið 2001 og að öll aðildarríki hafi komið Bandaríkjunum til aðstoðar.

Staða Póllands verri tapi Úkraínumenn

Tusk sagði að ef Úkraína yrði áfram fullvelda lýðræðisþjóð í framtíðinni, yrði Pólland og öll Evrópa öruggari fyrir vikið. Annars myndi staðan versna.

„Ef Úkraína tapar stríðinu, eða samþykkir skilmála eða uppgjöf sem veikir fullveldi þeirra og gerir Pútín [Forseta Rússlands] auðveldara að ná tökum á Úkraínu, þá er staða Póllands, án nokkurs efa og við erum öll sammála um þetta, í varnarmálum orðin mun erfiðari,“ sagði Tusk.

Hann nefndi einnig í ræðunni að Pólverjar, sem hafa þegar aukið fjárútlát til varnarmála til muna á undanförnum árum, þyrftu að verða sér út um háþróuð vopn. Bæði hefðbundin og kjarnorkuvopn.

„Þetta er alvarlegt kapphlaup. Kapphlaup til öryggis, ekki stríðs.“

Ummæli og aðgerðir Trumps og embættismanna hans á undanförnum vikum hafa leitt til mikilla áhyggja í Evrópu um að heimsálfan geti ekki treyst á Bandaríkjamenn. Þetta hefur meðal annars opnað á umræðu um fælingarmátt Evrópu þegar kemur að kjarnorkuvopnum. Eins og staðan er núna eiga eingöngu Bretar og Frakkar kjarnorkuvopn í Evrópu, að Rússum undanskildum.

Fyrrnefndu ríkin tvö eiga þó einungis nokkur hundruð slík vopn og Rússar eiga að minnsta kosti fimm þúsund.

Sjá einnig: Íhugar að bjóða fram fælingarmátt kjarnorkuvopnabúrsins

Óljóst er hvort Tusk hafi verið að tala um hvort Pólverjar ættu að koma sér upp eigin kjarnorkuvopnum eða taka þátt í einhverskonar samstarfi með Frökkum, eða öðrum sem eiga kjarnorkuvopn.

Ætla í mikla uppbyggingu

Leiðtogar ríkja Evrópusambandsins samþykktu í gær verulega aukningu fjárútláta til varnarmála og umfangsmiklar hernaðaruppbyggingu, samhliða endurreisn hergagnaiðnaðar Evrópu. Þá sagði Tusk að Evrópa væri í vopnakapphlaupi við Rússa og að Evrópa myndi vinna í því kapphlaupi.

„Evrópa verður að vera tilbúið í þetta vopnakapplaup og Rússland mun tapa því eins og Sovétríkin gerðu fyrir fjörutíu árum.“