Trump nefnir nýja kyn­slóð orrustuskipa í höfuðið á sjálfum sér

„Þegar Trump-skipið USS Defiant birtist á sjóndeildarhringnum, munu óvinir okkar átta sig á því að bandarískur sigur á sjó er óumflýjanlegur,“ segir John Phelan, ráðherra málefna sjóhersins.

Hingað til hafa kynslóðir orrustuskipa verið nefndar í höfuðið á ríkjum Bandaríkjanna en Trump, sem er þekktur fyrir að setja nafn sitt á allt milli himins og jarðar, hefur verið einkar duglegur við það síðustu misseri að finna því stað í bandaríska stjórnkerfinu.

Fyrr í þessum mánuði var Friðarstofnunin í Washington endurnefnd í höfuðið á forsetanum og þá samþykkti stjórn Kennedy-menningarmiðstöðvarinnar í síðustu viku að endurnefna miðstöðina „the Trump-Kennedy Center“. Þess ber að geta að Trump skipaði sjálfan sig stjórnarformann fyrr á árinu.

Phelan sagði í samtali við blaðamenn í gær að orrustuskipin yrðu myndarlegustu herskip heims og byssur þeirra þær stærstu í heimi. Þá kynnti hann til sögunnar USS Defiant. „Þetta skip verður ekki bara gert til að fella niður örvarnar, heldur drepa bogamanninn,“ sagði hann.

Byrjað verður á tveimur skipum að sögn ráðamanna vestanhafs en þau gætu orðið allt að 25. 

Guardian greindi frá.