Evrópu­sam­bandið frestar tolla­hækkunum

Ursula von der Leyen, forseti framkvæmdastjórnar Evrópusambandsins, greindi frá þessu í morgun. Aðgerðir Evrópusambandsins (ESB) áttu að taka gildi þann 15. apríl og hefur þeim nú sömuleiðis verið frestað um níutíu daga.

Von der Leyen segir að ESB vilji láta reyna á viðræður við Bandaríkjastjórn en ef þær skili ekki viðunandi árangri muni fyrirhugaðar tollahækkanir sambandsins á vöruinnflutning frá Bandaríkjunum taka gildi.

„Líkt og ég hef áður sagt þá eru allir möguleikar enn á borðinu,“ segir Von der Leyen í yfirlýsingu sem greint er frá í umfjöllun The Guardian.

Samþykktu hefndaraðgerðir rétt áður en Trump tilkynnti frestun

Öll aðildarríki ESB, að Ungverjalandi undanskildu, samþykktu í gær að beita Bandaríkjastjórn mótvægisaðgerðum einungis nokkrum klukkustundum áður en Trump tilkynnti að hann myndi gera hlé á tollahækkunum á vörur frá Evrópusambandinu og fleiri ríkjum. 

Til stóð að innleiða hefndaraðgerðirnar í þremur áföngum og áttu tollahækkanirnar að hafa áhrif á bandarískar vörur að andvirði 3,9 milljarða evra frá og með 15. apríl. Mánuði síðar áttu aðgerðirnar að ná til innflutnings að andvirði annarra 13,5 milljarða evra og loks 3,5 milljarða evra til viðbótar þann 1. desember.

Bandaríkin lögðu tuttugu prósent toll á vöruinnflutning frá Evrópusambandinu en tilkynntu svo skyndilega níutíu daga hlé líkt og áður segir. Á meðan verður tíu prósent almennur tollur lagður á innflutning frá ESB og öðrum ríkjum, að undanskildu Kína sem fær á sig 125 prósent toll. Áfram verður 25 prósent tollur lagður á bifreiðar, stál og ál sem flutt er inn er frá ESB og öðrum ríkjum til Bandaríkjanna. 

Fréttin hefur verið uppfærð.