Bjarni kynnti ákvörðunina á blaðamannafundi í morgun, þar sem hann sagði ástæðuna vera álit Umboðsmanns Alþingis um söluna á Íslandsbanka. Niðurstaða Umboðsmanns var sú að í ljósi þess að faðir Bjarna var á meðal kaupenda hefði Bjarna brostið hæfi þegar hann samþykkti tillögu Bankasýslunnar um söluna. Bjarni fór á fundinum yfir þær athugasemdir sem hann hafði við álit Umboðsmanns, en sagðist engu að síður munu virða það og axla ábyrgð, áður en hann tilkynnti um afsögn sína.
Arndís Anna Kristínardóttir Gunnarsdóttir, þingmaður Pírata, segist telja að um rétta ákvörðun hafi verið að ræða. Niðurstaða Umboðsmanns hafi ekki komið á óvart, ekki frekar en afsögn Bjarna.
„Það sem hins vegar kannski veldur áhyggjum er að um leið og hann segir af sér þá vefengir Bjarni niðurstöðu Umboðsmanns, sem vekur upp þær áhyggjur að það verði ekki dreginn sá lærdómur af þessari niðurstöðu sem vonir stóðu til,“ sagði Arndís í beinni útsendingu frá Alþingi.
Almennt erfiðara að losna við ráðherra
Einnig var rætt við Ingu Sæland, formann Flokks fólksins, sem sagði um söguleg pólitísk tímamót að ræða.
„Við erum vitni að því að hér stígur ráðherra fram og segir af sér strax í kjölfarið á áliti Umboðsmanns. Við höfum hingað til þurft að hafa virkilega fyrir því að losna við þá, eins og við vitum. Þannig að maður veltir fyrir sér á hvaða taflborði við erum núna. Erum við peð á einhverju refskákborði fráfarandi fjármálaráðherra? Ég veit það ekki,“ sagði Inga, og bætti við að það yrði spennandi að sjá hvað gerðist næst.
„Hvort að ríkisstjórnin stendur þetta af sér. Ég veit að þau vilja væntanlega ekki fara í kosningar akkúrat núna, en ég held að þau séu afskaplega veik.“
Þá sagðist Inga telja að Bjarni hefði sett fordæmi, sem kynni að gilda í máli Svandísar Svavarsdóttur. Umboðsmaður er nú með stjórnsýsluframkvæmd hvalveiðibanns sem Svandís setti í sumar til skoðunar.
„Ef hún fær einn á baukinn hjá Umboðsmanni, þá verður hún sannarlega líka að hugsa sína stöðu. Fordæmin hafa verið lögð. Bjarni Benediktsson gerði það í morgun og ég held að hann hafi tekið rétta ákvörðun,“ sagði Inga.
Allt sem mátti rannsaka hafi komið illa út
Kristrún Frostadóttir, formaður Samfylkingarinnar, segir fólk innan raða síns flokks telja að ákvörðun Bjarna hafi verið rétt. Hún minnti á að ákvörðunin ætti sér langan aðdraganda.
„Þetta er þriðja niðurstaðan í því sem hefur verið rannsakað sem kemur illa út. Allt sem hefur mátt rannsaka hefur komið illa út. Skýrsla ríkisendurskoðanda, skýrsla FME og nú álit Umboðsmanns Alþingis. Það sem maður hefur auðvitað áhyggjur af er að það er varla bætandi á þetta kaos í ríkisstjórninni,“ sagði Kristrún.
Staðan væri erfið í efnahags- og velferðarmálum, og nú væri útlit fyrir að enginn yrði starfandi fjármálaráðherra í miðri fjárlagavinnu.
„Þannig að við hljótum að gera þá kröfu til ríkisstjórnarinnar að hún komi þá með aðgerðir, tali ekki bara um að standa saman til þess eins að sitja í sínum stólum, heldur komi með alvöru aðgerðir að borðinu fyrir fólkið í landinu,“ sagði Kristrún.
